Дүниежүзілік гимназиада аясында Сербияның Златибор қаласында Халықаралық мектеп спорт федерациясы (ISF) жыл сайынғы Бас Ассамблеясын өткізді. Бұл маңызды жиынға ISF мүшелері бетпе-бет және онлайн форматта қатысты.

Жиын ISF президентінің міндетін атқарушы Юсеф Белкасми, Сербияның спорт министрі Зоран Гаич және жергілікті ұйымдастыру комитетінің төрағасы Желько Танасковичтің құттықтау сөздерімен ашылды. Жиынның басты оқиғасы 2025–2026 жылдарға арналған ISF президентін сайлау болды. Сайлау процесі бақылаушылардың қадағалауымен өтті. Лауазымға екі үміткер ұсынылды: мырза Желько Танаскович (Сербия) және доктор Сакир Аль Халифа (Бахрейн).

Кандидаттар өздерінің бағдарламаларын таныстырғаннан кейін, қатысушылар электрондық дауыс беру жүйесі арқылы өз таңдауларын жасады. Нәтижесінде мырза Желько Танаскович 81 дауыстың 55-ін жинап, ISF президенті болып сайланды. Оның өкілеттігі 2026 жылғы келесі сайлауға дейін жалғасады.

Желько Танаскович – кәсіби волейболшы, Сербия ұлттық құрамасының бұрынғы капитаны. Ол Олимпиадада қола медаль, Әлем чемпионатында күміс медаль жеңіп алған спортшы. Қазіргі уақытта ол Сербия және Еуропалық мектеп спорты федерацияларының президенті қызметін атқарады. Сонымен қатар, ISF Атқарушы комитетінің ұзақ мерзімді мүшесі және Еуропадағы ISF президенті ретінде ол кәсіби және мектеп спорты салаларында үлкен тәжірибе жинаған. Оның басшылығымен Сербия соңғы жылдары ISF-тің 10-нан астам іс-шарасын, оның ішінде 2021 жылғы алғашқы және биылғы үшінші Дүниежүзілік гимназиаданың ұйымдастырды.

Xinhua ақпарат агенттігіне берген сұхбатында жаңа президент өз миссиясын атап өтті: «Біз барлық балаларға мүмкіндік беруіміз керек. Мектеп жарыстарына тек мектеп командалары қатысуы тиіс. Өкінішке қарай, біз кей жарыстарда өз миссиямыздан алыстап кеттік», – деді Желько мырза.

ISF жастарды спорт және білім арқылы дамытуға бағытталған жұмысын жалғастыруда. Федерация жаңа басшымен бірге инклюзивті басқару мен ұжымдық көшбасшылық негізінде өз қызметін нығайтуды жоспарлап отыр. ISF құрылымы ашықтық пен демократиялық шешім қабылдауды қамтамасыз етеді. Бас Ассамблея – ұйымның жоғарғы органы, ал Басқарушы және Атқарушы комитеттер оның стратегиялық бағытын қалыптастыруда маңызды рөл атқарады.

ISF өз тарихының жаңа кезеңіне қадам баса отырып, халықаралық мектеп спорт жарыстары мен білім беру бағдарламалары арқылы оқушыларға жаңа мүмкіндіктер ұсынуға және өз мүшелеріне қолдау көрсетуге дайын.