Бүгін Талдықорғанда VII Жасөспірімдер ойындары аясында ұйымдастырылған регби-7 бойынша жасөспірімдер мен қыздар арасындағы жарыстар өз мәресіне жетті.

Qazaqstan Rugby бастамасымен өткізілген бұл турнир елімізде жасөспірімдер регбисінің дамуына серпін берген маңызды әрі жарқын кезең болды. Жарыс Қазақстанның түрлі өңірлерінен жиналған үздік командаларды біріктіріп, жас спортшылардың жоғары дайындық деңгейін айқын көрсетті.

Жасөспірімдер арасындағы бәсекеде бірінші орынды Алматылық команда лайықты түрде жеңіп алды - олар өзара үйлесімді әрі сенімді ойын көрсетті. Жетісу облысының құрамасы финалға дейін жетіп, басты фавориттерге лайықты қарсылық танытып, күміс жүлдеге ие болды. Қостанай облысының командасы қола медальді еншіледі - олар да командалық рухты және күрескерлік мінезді айқын көрсетті.

Қыздар арасындағы жарыста Жетісу облысының командасы үздік техника мен стратегияны паш етіп, жеңіске жетті. Екінші орынды Алматы қаласының, үшінші орынды Қостанай облысының құрамалары иеленді.

Турнир қорытындысы бойынша Qazaqstan Rugby Мектеп спорт федерациясымен бірлесіп, алдағы Азия чемпионатында ел намысын қорғайтын ұлттық құрамасын жасақтауға кірісті. Чемпионат 8-12 тамыз күндері Гонконг қаласында өтеді және бұл жарыс жас қазақстандық регбишілер үшін маңызды халықаралық сынақ болмақ.

Жаңалықтардан қапы қалмаңыз!

Бізбен бірге болыңыз!