Бүгін Қазақстан регби федерациясы мен Мектеп спорты федерациясының бірлескен кеңесі өтті. Жиын елімізде регбиді дамытудың өзекті мәселелеріне арналды.

Кеңесте Гонконгте өткен Азия чемпионатында қазақстандық мектеп командаларының қатысу қорытындылары шығарылды. Жас спортшылардың жетістіктері, жоғары нәтижелерге ұмтылысы және олардың жинаған тәжірибесі атап өтіліп, бұл тәжірибенің Қазақстанның халықаралық аренадағы беделін нығайтуға негіз болатыны айтылды.

Кеңестің негізгі жаңалығы - регбиді дамыту жөніндегі Ұлттық үйлестірушіні тағайындау болды. Бұл лауазымға Ербол Амиртаев бекітілді. Оның міндеті - Регби федерациясы, Мектеп спорты федерациясы және мүдделі ұйымдардың күш-жігерін біріктіре отырып, балалар мен жасөспірімдер арасында ойынның жүйелі дамуына ықпал ету, жарыстар географиясын кеңейту және білікті мамандар даярлау.

Кеңеске қатысушылар ортақ жұмысқа дайын екендіктерін білдіріп, нақты қадамдар бойынша келісімге келді:

жарыстық іс-шараларды кеңейту;

жаттықтырушылар мен мұғалімдерге арналған білім беру семинарларын ұйымдастыру;

заманауи әдістемелік материалдар әзірлеу;

бұқаралық спортты дамытуға бағытталған бірлескен жобаларды жүзеге асыру.

Қазақстан регби федерациясы мен Мектеп спорты федерациясы мектеп регбиін елдің спорттық өмірінің маңызды бөлігіне айналдыруға және жас ұрпақты күш-жігерге, бірлікке әрі салауатты өмір салтына тәрбиелеуге бағытталған ынтымақтастықты тереңдететінін мәлімдеді.