2024 жылғы 12-13 желтоқсанда Астанада (Қазақстан) «Білім беру ұйымдарында дене тәрбиесінің тұжырымдамалық негіздерін трансформациялау» тақырыбында халықаралық ғылыми-тәжірибелік конференция сәтті өтті.
Іс-шара Назарбаев Университетінің Жоғары медицина мектебі алаңында Қазақстан Республикасының Оқу-ағарту министрлігінің қолдауымен ұйымдастырылды. Конференцияға әлемнің жетекші сарапшылары, ғылыми қауымдастық өкілдері, педагогтар мен дене шынықтыру және спорт саласындағы мамандар қатысты.
Конференцияның негізгі мақсаттары:
дене тәрбиесінің өзекті мәселелерін талқылау және білім беру ұйымдары үшін заманауи шешімдер табу;
білім алушылардың салауатты өмір салтын қалыптастыруда дене белсенділігін стратегиялық түрде енгізу жолдарын айқындау;
дене шынықтыру және бұқаралық спортты дамыту мәселелері бойынша халықаралық тәжірибемен алмасу.
Конференцияға маңызды халықаралық серіктестер – Халықаралық мектеп спорт федерациясы (ISF), Дүниежүзілік денсаулық сақтау ұйымының (WHO) және ЮНЕСКО-ның Қазақстандағы өкілдіктері қатысты.
ISF Президентінің міндетін атқарушы Юссеф Белькасми конференция қатысушылары алдында сөйлеген сөзінде дене тәрбиесінің жаһандық тәсілдерін қалыптастырудағы маңыздылығын атап өтті. Сонымен қатар, ол Қазақстанның халықаралық спорттық жобаларға белсенді қатысушы ретіндегі рөлін жоғары бағалады. Ол дене тәрбиесінің дені сау әрі үйлесімді ұрпақ қалыптастыруда шешуші фактор екенін баса айтып, спортты әр бала үшін өмірдің ажырамас бөлігіне айналдыруға бірлескен күш салуға шақырды.
Конференция бағдарламасы аясында тақырыптық семинарлар, жетекші мамандардың шеберлік сыныптары және дене тәрбиесі мен спорт саласындағы жетістіктер көрмесі өтті. Ерекше назар білім беру процесіне жаңа әдістер мен құралдарды енгізу мәселелеріне аударылды.
Танымал спортшылар мен жаттықтырушылардың шеберлік сыныптары оқушылардың физикалық дағдыларын дамыту мен олардың ынтасын арттыруға арналған заманауи әдіс-тәсілдерді көрсетті.
Тәжірибе алмасу семинарлары дене тәрбиесі мен бұқаралық спорт саласындағы үздік халықаралық тәжірибелерді талқылауға мүмкіндік берді.
Спорттық жетістіктер көрмесі қатысушыларды дене белсенділігінің қолжетімділігін арттыруға бағытталған озық жобалар және технологиялармен таныстырды.
Конференцияның қорытындысы бойынша білім беру ұйымдарында дене тәрбиесі жүйесін жаңғыртуға бағытталған нақты ұсынымдар қамтылған қорытынды қарар қабылданды:
дене шынықтыру пәнінің оқу бағдарламаларын халықаралық стандарттарға сәйкес жаңарту және бейімдеу;
дене белсенділігіне теңдей қолжетімділікті қамтамасыз ету мақсатында спорттық инфрақұрылымды дамыту;
педагогтардың біліктілігін арттыру және оқытудың инновациялық әдістерін енгізу;
отбасылар мен жергілікті қауымдастықтарды бұқаралық спортқа және дене белсенділігіне тарту;
балалар мен жастар арасында мақсатты білім беру бастамалары арқылы салауатты өмір салтын насихаттау.
Конференция дене тәрбиесінің қоғамның тұрақты дамуының ажырамас бөлігі ретіндегі негізгі рөлін тағы бір мәрте растады. Қабылданған ұсынымдар Қазақстанда және халықаралық деңгейде дене тәрбиесі жүйесін реформалау бойынша келесі қадамдардың негізіне айналады.
Халықаралық серіктестер мен сарапшылардың белсенді қатысуының арқасында конференция дені сау ұрпақ қалыптастыруға бағытталған диалог пен тәжірибе алмасудың маңызды алаңына айналды.
