Бүгін Алматыда «Халық» қайырымдылық қоры мен Мектеп спорт федерациясы арасында ынтымақтастық туралы меморандумға қол қойылды.

Құжат ауылдық жерлерде спортты дамытуға және танымал етуге бағытталған «Ауыл спорт» әлеуметтік жобасын қолдауды көздейді. Бұл бастама ауыл жастарының спортпен шұғылдануына кең мүмкіндік ашып, талантты спортшылардың кәсіби дамуына ықпал етеді.

Ынтымақтастық аясында тараптар ауыл спортының қазіргі ахуалын жан-жақты талдап, жасөспірімдер мен жастарға арналған спорттық іс-шаралар ұйымдастырады. Сондай-ақ, олардың ынтасын арттыруға бағытталған арнайы бағдарламалар әзірленеді. Перспективалы спортшылардың халықаралық аренаға шығуына ерекше назар аударылады.

Меморандум аясындағы алғашқы маңызды нәтижелердің бірі - өткен жылғы аталған жоба аясындағы республикалық турнир жеңімпаздарының 4-14 сәуір аралығында Сербияда өтетін Дүниежүзілік гимназиадаға қатысуы болмақ. Қазақстандық жас спортшылар ел намысын бокс, еркін күрес және шахмат спорт түрлерінде қорғайды. Бұл олардың әлемдік деңгейде өздерін дәлелдеуге және халықаралық жарыстарда мол тәжірибе жинауға бірегей мүмкіндік береді.

«Халық» қайырымдылық қоры әлеуметтік маңызы бар бастамаларды қолдау миссиясын жалғастырып, ал Мектеп спорт федерациясы жас таланттарды дамыту бағытында белсенді жұмыс жүргізуде. Меморандумға қол қойылуы - балалар мен жасөспірімдер спортын дамытуға, ауылдық спортшылардың бәсекеге қабілеттілігін арттыруға және жастары арасында салауатты өмір салтын кеңінен насихаттауға жасалған маңызды қадам.